اسلام آباد (نيشنل ڊيسڪ) قومي سلامتيءَ جي ڪاميٽيءَ جو اجلاس شروع ٿي ويو آهي جنهن ۾ وزيراعظم شهباز شريف، آرمي چيف جنرل عاصم منير سميت اهم سياسي ۽ فوجي قيادت شريڪ آهي.
قومي اسيمبليءَ ۾ ٿيندر قومي سلامتي ڪاميٽيءَ جي اجلاس جي باقاعدي شروعات ٿي وئي، جنهن ۾ وزيراعظم شهباز شريف، دفاع وارو وفاقي وزير خواجه آصف، آرمي چيف جنرل عاصم منير ۽ ڊي جي آءِ ايس آءِ عاصم ملڪ سميت اهم سياسي ۽ فوجي قيادت شريڪ آهي.
تحريڪ انصاف جا ميمبر اجلاس ۾ شريڪ ناهن ٿيا پر ڪي پي جو وڏو وزير علي امين گنڊاپور اجلاس ۾ پنهنجي صوبي جي نمائندگي ڪري پيو، جڏهن ته وزير اعليٰ پنجاب مريم نواز ۽ بلوچستان جو وڏو وزير سرفراز بگٽي به اجلاس ۾ شريڪ آهن.
گورنر بلوچستان ۽ گورنر ڪي پي، چئني صوبن جا آءِ جي پوليس به قومي سلامتي ڪميٽي جي اجلاس ۾ شريڪ آهن.
پيپلز پارٽيءَ جي 16 پارليامينٽ ميمبر بلاول ڀٽو جي سربراهي ۾ اجلاس ۾ شريڪ آهن ۽ ايم ڪيو ايم جا 4 اسيمبلي ميمبر خالد مقبول صديقي جي اڳواڻي ۾ اجلاس ۾ شريڪ آهن، جڏهن ته مولانا فضل الرحمان به اجلاس ۾ شريڪ آهي.
