سيڪيورٽي فورسز ۽ قانون لاڳو ڪندڙ ادارن خارجين جي موجودگيءَ جي اطلاع تي گڏيل آپريشن ڪيو
پشاور (نيشنل ڊيسڪ) خيبرپختو خوا جي ضلعي سوات ۾ سيڪيورٽي فورسز ۽ قانون لاڳو ڪندڙ ادارن جي گڏيل آپريشن ۾ 4 خارجي دهشتگرد مارجي ويا.
پاڪ فوج جي عام لاڳاپن واري شعبي آءِ ايس پي آر موجب سيڪيورٽي فورسز ۽ قانون لاڳو ڪندڙ ادارن خارجين جي موجودگيءَ جي اطلاع تي سوات ضلعي ۾ انٽيليجنس بنياد تي گڏيل آپريشن ڪيو.
سيڪيورٽي فورسز جي اهلڪارن جي خارجين جي ٿاڪن تي اثرائتي ڪارروائيءَ جي نتيجي ۾ 4 خارجي دهشتگرد مارجي ويا.
مارجي ويندڙ خارجين جي قبضي مان هٿيار ۽ بارود به هٿ ڪيو ويو، مارجي ويندڙ خارجي علائقي ۾ دهشتگرديءَ جي ڪيترين ئي ڪاررواين ۾ ملوث هئا.
آءِ ايس پي آر موجب علائقي ۾ ملندڙ ڪنهن به امڪاني خارجي دهشتگرد جي خاتمي جي لاءِ ڪليئرنس آپريشن به ڪيو ويو.
جاري بيان ۾ چيو ويو آهي ته پاڪستان جي قانون لاڳو ڪندڙ ادارن سان گڏجي سيڪيورٽي فورس ملڪ مان دهشتگرديءَ جي لعنت کي ختم ڪرڻ لاءِ پرعزم آهي.
